just.for.readinggg 以前同嫲嫲一齊住嘅時候，佢有一句口頭禪：「而家呢一代人真係好幸福。」
嫲嫲成日講以前點樣冇得食、冇得住，再講落去就會講埋日本仔打到嚟，最後就會落到呢個結論：而家呢一代人真係好幸福。
事實係咪真係咁呢？我冇喺上一個年代生活過，我唔知道佢哋嘅生活到底有幾艱苦，但你問我覺得自己係咪過得好幸福？我又唔係好覺。上一代人好多時都會將幸福度與物質生活掛鉤，佢哋覺得而家呢代人好幸福，好主要係因為而家嘅人唔需要捱餓，亦都唔需要經歷戰爭，而且有充足嘅娛樂。
但呢種物質生活係咪就代表幸福呢？容許我用奧地利作家 Harald Koisser 嘅著作《為什麼我們明明過得很好卻不快樂？》回應呢種睇法，相信好多人，都有呢個諗法，明明身邊嘅物質生活好豐富，但偏偏就好難覺得開心。
我相信人係求進步嘅，物質生活越嚟越好，就係進步嘅表現，我哋追求嘅快樂、幸福同時一齊進步。物質條件得到滿足之後，我哋就會追求心靈上嘅滿足，經濟學嘅基本定義就話俾我哋聽：人嘅慾望係無限，我哋追求快樂、幸福嘅程度，都係無限嘅。
如果要比較嘅話，就應該蘋果對蘋果，波鞋對波鞋，唔係拎個蘋果同波鞋做比較，因為兩者嘅標準根本唔同。所以我哋都唔應該用上一代對幸福、快樂嘅標準嚟衡量而家呢個世代。
呢一代人嘅物質生活的確好豐盛，但同時，面對住上一代人唔需要面對嘅問題同埋困難，好似全球變暖、無限QE、階級固化等等嘅問題，而呢一啲問題，都唔係上一代人需要面對嘅，所以當佢哋話呢一代好幸福嘅時候，相信喺石器時代嘅人，如果自己砌到部時光機出嚟，再穿越去到上世紀40年代，佢哋一樣會話「而家呢一代人真係好幸福。」唔使同獅子老虎搏鬥，仲可以唔使住山窿。
回應返一開始嘅問題，究竟邊一代人生活比較幸福呢？講到底我都係冇答案，或者對於每一個人嚟講，最幸福嘅時代，就係下一代，因為咁樣講，先可以突顯到自己生活嘅時候有幾辛苦，從而自覺喺新一代面前高人一等，亦即係「老屎忽」心態。
自從二月開始，一直在家工作，有時諗起 2019 年出世嘅一代，率先經歷社會運動，之後再有肺炎疫情爆發，每次出街都要戴口罩，幾乎從來冇吸過一口新鮮空氣；去外國旅行變成妄想，或者佢哋將來十年，都唔會有坐飛機去旅行嘅體驗。
就算想同留港消費，堂食冇得食、迪士尼海洋公園冇得去、冇得去戲院，等等，見到一個咁樣嘅未來，我真係講唔出「而家呢代人好幸福」。
我唔知道將來嘅世界會係點樣，但相信，下一代需要面對嘅問題，將會比而家更加困難、更加絕望、更加不知所措，希望將來嘅日子，記得自己今日講過嘅說話，千祈唔好同下一代人講「宜家呢個世代真係好幸福」，呢句說話真係難聽過粗口。
